CHINA. – ’n Brand, vermoedelik weens ‘n besoeker se onoordeelkundige gebruik van wierook of kerse het aansienlike skade aan die Wenchang-paviljoen, by die Yongqing-tempel in Zhangjiagang, Jiangsu-provinsie, veroorsaak.
Die tempel, wat aan die westelike voet van Fenghuang-berg geleë is, is meer as 1 500 jaar oud. Dit is ’n drieverdieping-houtstruktuur binne die tempelkompleks, maar is ’n moderne herboude struktuur, nie ’n gebou van die oorspronklike tempel nie. Dit is oorspronklik gedurende die Oos-Wu-dinastie gebou en in 536 n.C. tydens die Suidelike Dinastieë uitgebrei. Hierdie uitbouing het dit gevestig as een van die bekende “480 tempels van die Suidelike Dinastieë” en as ’n belangrike godsdiensligging in die Jiangnan-streek.
Die oorspronklike struktuur is in die laat 1950’s vernietig, waarna slegs ruïnes oorgebly het. Heropbou op grond van die historiese ontwerp is in die 1990’s begin en het die moderne weergawe van die terrein gevorm. Met die huidige skade het dele van die dak ineengestort en houtondersteunings is blootgestel. Daar is egter geen beserings of sterftes aangemeld nie.
Ondersoeke na die oorsaak is steeds aan die gang, maar plaaslike media het berig dat die brand moontlik verband hou met die onoordeelkundige gebruik van wierook of kerse deur ’n besoeker. Amptenare het aangedui die beskadigde dele sal herstel word in ooreenstemming met die oorspronklike argitektoniese styl waarop die herbou gebaseer is.
Bronne: City News Service, ziradaily.com, China Daily Asia, China Daily, Getaway Magazine
