Die nasionale verbruikerskommissie het 38 verdere verkopers opgespoor wat geld van verbruikers ontvang het, maar nie die beloofde goedere of dienste gelewer het nie, of gebrekkige produkte voorsien het.
Volgens die kommissie het die verkopers in Gauteng, Noordwes, die Wes-Kaap en KwaZulu-Natal sake gedoen. In baie gevalle is die ondernemings nie meer bereikbaar nie nadat hulle van hul bekende adresse padgegee het of hul webwerwe gesluit het, wat dit vir verbruikers onmoontlik maak om klagtes op te volg.
Die NVK sê sommige aanlyn verkopers doen hulle voor as wettige besighede om verbruikers te mislei, terwyl ander geen kontakbesonderhede verskaf nie. Dit beteken verbruikers kan nie foutiewe of verkeerde bestellings terugstuur of terugbetalings eis nie.
Die kommissie waarsku dat aanlyn kliënte toenemend deur bedrieërs uitgebuit word en doen ’n beroep op verbruikers om baie versigtig te wees wanneer hulle aanlyn aankope doen. Tot dusver het die NVK reeds 95 onopspoorbare verkopers geïdentifiseer.
