GAUTENG — Matome Chiloane, die LUR van onderwys in Gauteng, het bekend gemaak dat 4 858 leerders nog nie vir gr. 1 of gr. 8 geplaas is nie. Dit is ondanks vooruitgang in die aanlyn toelatingsproses vir 2026.
Luidens ‘n verklaring deur Steve Mabona, departementele woordvoerder, is altesaam 1 381 gr. 1-leerlinge en 3 477 gr. 8-leerlinge nog nie in skole geplaas nie. Dit is net sowat 1,5% van al die aansoeke wat ontvang is – 358 574 vir gr. 1 en gr. 8 saam. Die meeste leerlinge wat nog nie ’n plek het nie, is in stedelike distrikte, waar bevolkingsgroei en beperkte skoolkapasiteit druk veroorsaak.
Ekurhuleni is tans die mees benadeelde distrik, met 3 169 leerlinge wat nie geplaas is nie, veral graad 8’s in Ekurhuleni-Noord. In Johannesburg-Oos is ook baie leerlinge wat nie geplaas is nie, terwyl die situasie in Tshwane, Sedibeng en Wes-Rand beter is. Die departement gaan voort met daaglikse plasingaanbiedinge aan die ongeplaasde leerlinge. Beskikbare kapasiteit in skole word so strategies as moontlik benut.
Die laat aansoekperiode vir gr. 1 en gr. 8 sluit op 30 Januarie 2026. Ouers word aangeraai om vroegtydig die nodige dokumente by die gekose skool in te dien, aangesien finale plasing gedurende hierdie tydperk nie geweier kan word nie. Tot dusver is daar 11 183 laat aansoeke ingedien.
Oor appèlle en besware het die departement bevestig dat daar 6 736 appèlle is en slegs 637 besware wag nog op beoordeling. MEC Chiloane het ouers herinner dat die uitkomste finaal is. “Ons doen ’n beroep op ouers om geduldig te bly. Die departement werk hard om te verseker dat elke graad 1- en graad 8-leerder vir 2026 ’n plek kry,” sê Chiloane.
Ouers kan via www.gdeadmissions.gov.za aansoek doen en moet skole direk vanaf 14 Januarie 2026 besoek om dokumente in te dien.
