GAUTENG. – ’n Mediese noodgeval by die East Rand Mall het Maandagaand byna in ’n tragedie ontaard, was dit nie vir vinnige optrede deur verskeie rolspelers nie. Veiligheidspersoneel het ongewone gedrag by ’n bestuurder van ‘n BMW, vasgelê op geslotekringtelevisie by Uitgang 4, opgemerk, waarna ’n vroulike lid van Nogada Sekuriteit ingegryp het. ‘n Geval van uiters lae bloedsuikervlakke kon betyds behandel word.
Legendary Guardians Exclusive Protection sê die bestuurder, ‘n vrou, kon skaars praat en het aangedui dat sy nie meer kan sien nie. ’n Paniekknoppie is onmiddellik geaktiveer, waarna die Legendary Guardians-beheerkamer verskeie reaksie-eenhede ontplooi het. Met hul aankoms was die bestuurder reeds buite die voertuig, gedisoriënteerd en onvas op haar voete. ’n Lid van die publiek het intussen gestop om bystand te verleen.
Dit het later geblyk dat daar geen mediese identifikasie of noodinligting by die pasiënt beskikbaar was nie, wat die aanvanklike assessering bemoeilik het. Deur ’n slimhorlosie is onlangse kontakte opgespoor, wat gelei het tot bevestiging van haar mediese fonds en die ontplooiing van ’n private ambulans. Paramedici van Miburn-ambulansdiens, bygestaan deur CLC Noodmediese Dienste, het die pasiënt ondersoek en vasgestel dat sy aan uiters lae bloedsuikervlakke gely het. Medikasie is toegedien, waarna haar toestand binne minute verbeter het. Sy is daarna veilig na Sunward Park-hospitaal vervoer. Niemand is verder beseer nie en die toneel is sonder verdere voorvalle ontruim.
Dié diens sê die rede waarom die voorval op sosiale media gedeel word, is om as ‘n herinnering te dien vir die belangrikheid om mediese noodinligting byderhand te hê. Vinnige reaksie en samewerking tussen veiligheidsdienste, nooddienste en die publiek is ook van kardinale belang. Dit baat om nie ‘n situasie te ignoreer nie, maar om hulp aan te bied.
