WES-KAAP. – Strandfontein Lifesaving-lewensredders het Woensdag vinnig en professioneel hulle vaardighede op ‘n ongelukstoneel toegepas. 16 passasiers, van wie drie kinders, is deur die ongeluk van ’n silwerkleurige Volkswagen Polo en ’n wit Toyota Avanza op Old Strandfonteinweg, tussen Baden Powell-rylaan en Pelican Heights, geraak.
Volgens Strandfontein Lifesaving het beserings van lig tot vermoedelike rugbeserings gewissel. Die eerste persone op die toneel was lewensredders Lisa Adams en Sanele Mkhasibe, wat die passasiers onmiddellik uit die voertuie gehelp en beserings begin evalueer het.
Toe nooddienste nie dadelik bereik kon word nie, het Lisa Adams vir Luqmaan Naidoo, ‘n senior lewensredder, gekontak. Naidoo en die res van die Strandfontein-span en Paul Newman het na die toneel gehaas. Die span het beseerdes behandel en die ernstigste beserings eerste geprioritiseer, terwyl ’n sleepwa-bestuurder die verkeer veilig gekoördineer het. Alle passasiers is gestabiliseer en later suksesvol aan nooddienste oorhandig.
Livesaving South Africa het die Strandfontein-span geprys vir hul samewerking, vinnige optrede en professionele hantering van die situasie.
