FlySafair het aangekondig dat ’n tydelike brandstofheffing op sekere vlugte ingestel word nadat die prys van vliegtuigbrandstof die afgelope tyd skerp gestyg het. Die heffing sal van vandag (Donderdag) af tot verdere kennisgewing in werking wees. Die maatskappy sê die prys van Jet A1-vliegtuigbrandstof by Suid-Afrikaanse lughawens het binne net een week met ongeveer 70% gestyg.
Volgens FlySafair hou die styging verband met ontwrigtings in wêreldwye olielewering as gevolg van die konflik in die Midde-Ooste. Die brandstofheffing sal geld vir kaartjies wat vanaf 12 Maart bespreek word. Die heffing sal apart op die kaartjie aangedui word sodat passasiers duidelik kan sien watter deel van die prys met die onlangse brandstofstyging verband hou. FlySafair sê passasiers wat hul plek reeds voor 12 Maart bespreek het, sal nie geraak word nie. Bestaande besprekings bly onveranderd en daar sal geen terugwerkende heffings wees nie.
Die lugredery sê hy het die hoër brandstofkoste vir so lank as moontlik self geabsorbeer om passasiers teen skielike prysstygings te beskerm, maar die jongste verhoging maak dit nodig om ’n deel van die ekstra koste te verhaal. Die bedrag van die brandstofheffing sal volgens die lengte van die vlug verskil, aangesien langer roetes meer brandstof vereis. FlySafair sê die maatreël is tydelik en sal gereeld hersien word, met die moontlikheid dat dit verminder of verwyder kan word wanneer brandstofpryse weer stabiliseer.
Druk hier om meer te lees.
