KWAZULU-NATAL. – ‘n Man is Donderdagoggend bewusteloos en vasgebind, in ’n kritieke toestand, in ‘n motorhuis van ’n woning in die Pinegate-gebied van Southgate in Phoenix aangetref.
KZN VIP Protection Services sê in ’n sosialemediaplasing hul noodreaksiespan is ontbied nadat bekommerde bure hulp gevra het ná die beseerde man ontdek is. Met hul aankoms het paramedici die slagoffer in ’n kritieke toestand aangetref, gestabiliseer en daarna na ’n nabygeleë mediese fasiliteit vervoer.
Volgens voorlopige inligting is die man met kabelbinders vasgebind in die motorhuis van die woning aangetref. Sy voertuig was nie op die toneel nie en ’n onbekende hoeveelheid waardevolle items is glo uit die huis gesteel.
Die gesteelde voertuig is beskryf as ’n wit JAC Double Cab 2.8 met registrasienommer CC23YSZN. In hierdie stadium is dit nog onduidelik hoeveel verdagtes by die voorval betrokke was, asook watter voertuig hulle moontlik gebruik het. Die omstandighede rondom die voorval word tans ondersoek. Alle nooddienste was op die toneel.
