INTERNASIONAAL. – Terwyl die Nordiese lande lank die World Happiness Report oorheers het, het 2026 een verrassing gebring. Vir die eerste keer in die verslag se 14-jarige geskiedenis het ’n Latyns-Amerikaanse land die top vyf gehaal, met Costa Rica wat tot die vierde plek gespring het, nadat dit in 2023 nog 23ste was. Die data wat pas vrygestel is, is vir 2025.
Suid-Afrika is 101ste op die lys, nadat dit sedert 2024 ses plekke gedaal het.
Volgens die webwerf van The World Happiness Report is die verslag die wêreld se voorste publikasie oor globale welstand en hoe om dit te verbeter. Die wêreldwye geluksranglys is gebaseer op ’n enkele vraag wat mense vra om die gehalte van hul lewe op ’n skaal van 0 tot 10 te beoordeel. Hulle kombineer oop-toegang data uit meer as 140 lande met hoëgehalte-ontledings deur toonaangewende navorsers uit ’n wye verskeidenheid akademiese dissiplines.
Geluk word gemeet aan die hand van ses kategorieë, onder andere BBP per capita, sosiale ondersteuning en gesonde lewensverwagting.
Vanjaar het die lande in die top vyf elk unieke faktore wat tot hul geluk bydra, hoewel die vryheid om lewenskeuses te maak by almal baie tel. Die organisasie World Happiness Report het met inwoners in elke land gesels om uit te vind wat bydra tot hul daaglikse en langtermyn gevoel van geluk – en hoe reisigers ’n voorsmakie van die plaaslike “gelukkige lewe” kan ervaar wanneer hulle daar besoek aflê.
Vir nege van die afgelope tien jaar beklee Finland die eerste plek. Die tien gelukkigste lande vir 2026 is Finland, Ysland, Denemarke, Costa Rica, Swede, Noorweë, Nederland, Israel en Luxemburg, met Switserland in die tiende plek.
Bronne: worldhappiness.report, World Population Review
