MPUMALANGA. – Fumu Mkalira Msiska (48), ‘n Malawiese burger en permanente Suid-Afrikaanse inwoner, sy vrou, Gladness Msiska Mkhonto (48), en sy swaer, Bongani Zoran Mkhonto (39), het Maandag op aanklagte van bedrog van bykans R27 miljoen in die Middelburg-landdroshof verskyn. Msiska en sy vrou, wat glo die Covid-19 Tydelike Werknemersverligtingskema (TERS) vir meer as 700 spook-werknemers geëis het, is elk op ‘n borgtog van R300 000 vrygelaat, terwyl die swaer se borgtog op R3 000 vasgestel is.
Lt.kol. Magonseni Nkosi, polisiewoordvoerder van die Valke, het bevestig dat die egpaar en hul familielid in die hof was oor bewerings dat hulle TERS uit bykans R27 miljoen bedrieg het. Die drie het hulself Sondag ná ‘n ondersoek deur die Valke, die Spesiale Ondersoekeenheid, die Werkloosheidsversekeringsfonds en die Nasionale Vervolgingsgesag se Bate-Verbeurdverklaringseenheid by die Valke in Nelspruit aangemeld. Volgens die ondersoek het Msiska se maatskappy, A and F Consulting, na bewering in 2020 altesame R26 943 793.19 ontvang deur vergoeding te eis vir meer as 700 spook-werknemers en voormalige werknemers. Die fondse is daarna na bewering oorgeplaas na Khulani Quality Contribution, ‘n maatskappy wat aan Gladness gekoppel is. Die swaer sou as tussenganger opgetree het deur identiteitsbesonderhede te bekom wat gebruik is om die bedrieglike eise te vergemaklik.
Monica Nyuswa, NVG-streekwoordvoerder, sê die beskuldigdes staar gesamentlik 4 294 aanklagte van bedrog en geldwassery in die gesig. Die saak spruit voort uit ‘n suksesvolle aansoek deur die Nasionale Vervolgingsgesag se Bate-verbeurdverklaringseenheid vir ‘n beperkingsbevel van meer as R26 miljoen teen bates wat aan die verdagtes gekoppel is, wat deur die Mpumalanga afdeling van die Hooggeregshof toegestaan is. ‘n Beperkingsbevel verbied ‘n persoon om sy bates te verkoop, oor te dra, weg te steek of op enige ander manier daarvan ontslae te raak terwyl ‘n strafsaak aan die gang is. Daar word beweer dat die maatskappy tussen Oktober 2020 en Januarie 2021 meer as 700 spook-werknemers by die Werkloosheidsversekeringsfonds (WVF) geregistreer het om aanspraak op TERS-fondse te maak.
Verdere ondersoeke het glo aan die lig gebring dat die geld gebruik is om roerende en onroerende bates ter waarde van meer as R31 miljoen aan te skaf, insluitend voertuie en geld in die verdagtes se bankrekeninge.
Die saak is vir verdere ondersoek tot 20 Julie uitgestel.
