Narsistiese mishandeling strek veel verder as ‘n moeilike verhouding en in sommige gevalle kan dit lei tot finansiële uitbuiting, gesinsgeweld, afpersing, teistering en ander ernstige misdade.
Mike Bolhuis van Specialised Security Services (SSS) waarsku ondersoeke toon dat slagoffers van manipulerende verhoudings dikwels nie net emosioneel benadeel word nie, maar ook hul spaargeld, ondernemings, loopbane, vriendskappe en selfvertroue verloor. In sommige gevalle kan die gevolge lewensgevaarlik wees.
SSS verduidelik dat mense met sterk narsistiese eienskappe aanvanklik dikwels vriendelik, selfversekerd en sjarmant voorkom. Hulle wen mense se vertroue deur oormatige aandag, geskenke en groot beloftes, maar begin later geleidelik beheer uitoefen. Volgens die maatskappy sluit waarskuwingstekens onder meer in dat ‘n persoon sy of haar maat van familie en vriende afsonder, finansies probeer beheer, voortdurend kritiek lewer, oormatige jaloesie toon en die slagoffer laat twyfel aan sy of haar eie geheue of oordeel, ‘n vorm van manipulasie wat as “gaslighting” bekend staan.
SSS beklemtoon dat nie alle narsiste misdadigers is nie, maar sê persone met uitgesproke narsistiese gedrag kom gereeld voor in ondersoeke na sake oor bedrog, romanse-bedrog, identiteitsdiefstal, afpersing, kuberteistering, gesinsgeweld, bekruiping en dwangbeheer. Hulle waarsku ook dat sosiale media misbruik kan word om slagoffers dop te hou, vals inligting te versprei, mense se identiteit na te boots of intieme foto’s vir afpersing te gebruik.
Mense wat vermoed dat hulle gemanipuleer of beheer word, word aangeraai om kontak met familie en vriende te behou, hul finansies te beskerm, dreigende gedrag te dokumenteer, professionele hulp te soek en enige moontlike misdrywe onmiddellik by die polisie aan te meld. Bolhuis sê bewusmaking is een van die doeltreffendste maniere om mense teen manipulasie en die gevolge daarvan te beskerm. Volgens hom kan die vroeë herkenning van waarskuwingstekens help om jare se emosionele trauma en groot finansiële verliese te voorkom.
Druk hier om meer te lees.
