Volgens Statistieke SA het vroue deesdae minder kinders as vorige geslagte, maar die bevolking groei steeds. Suid-Afrika se bevolking het die afgelope twee dekades aansienlik gegroei en word in 2026 op 63,5 miljoen mense geraam, vergeleke met 42,9 miljoen in 2002.
Statistieke Suid-Afrika se jongste middeljaarbevolkingsramings (MYPE) 2026 wat vrygestel is, het aangedui die bevolking het tussen 2025 en 2026 met 1,2% toegeneem. Die groei word deur geboortes, sterftes en migrasie beïnvloed en ondanks minder kinders as vorige geslagte, hoofsaaklik toegeskryf aan die land se relatief jong bevolking. Suid-Afrika het ook baie vroue van vrugbare ouderdom, terwyl vroue ook langer leef.
Die verslag toon dat ‘n vrou in Suid-Afrika na verwagting gemiddeld 2,12 kinders gedurende haar leeftyd sal hê, naby die vlak wat nodig is om die bevolking oor tyd te laat voortbestaan. Daar is tans sowat 17 geboortes per 1 000 inwoners.
Vroue vorm ook die meerderheid van die bevolking. Ongeveer 32,3 miljoen, of 51% van Suid-Afrika se inwoners, is vroue. Hoewel daar gemiddeld 103 seuns vir elke 100 meisies gebore word, leef vroue oor die algemeen langer as mans, wat daartoe bydra dat hulle uiteindelik die groter deel van die bevolking uitmaak.
Volgens Statistieke Suid-Afrika het die land se bevolkingsgroei tydens die Covid-19-pandemie verlangsaam weens die skerp toename in sterftes. Sedertdien het sterftesyfers weer genormaliseer en die bevolking het volhoubare groei, al kies gesinne toenemend om minder kinders te hê.
Druk hier om meer te lees.
