Waarskuwing: Die foto mag sensitiewe lesers ontstel.
GAUTENG. – ’n Man is Saterdagoggend ernstig beseer en vasgebind in sy plaashuis buite Cullinan aangetref. Hy was glo vir ure lank aangerand en gemartel.
Volgens Echo-1 Security het hulle Vrydagaand inligting ontvang dat ’n groep verdagtes ’n misdaad in die Cullinan- of Bronkhorstspruit-gebied beplan. ’n Voertuig wat vermoedelik met die groep verbind word, is later geïdentifiseer en deur die nag dopgehou. Die voertuig het die volgende oggend glo teruggekeer om die verdagtes op te laai. Taktiese veiligheidsbeamptes het die voertuig in Welbekend voorgekeer, waar drie verdagtes in hegtenis geneem is. Eiendom wat vermoedelik gesteel is, is ook in die voertuig gevind.
Volgens Echo-1 Security was die volgende uitdaging om plaaslike polisiebeamptes daarvan te oortuig dat ’n misdaad wel gepleeg is. Die veiligheidspan het die situasie en die eiendom wat teruggevind is, ontleed om vas te stel waar die vermeende misdaad plaasgevind het. Verdere ondersoek het die veiligheidsdiens na ’n plaashuis buite Cullinan gelei. Die slagoffer is glo op sy bed aangetref, nadat hy na bewering vasgebind en ernstig aangerand is. Hy het onder meer steekwonde opgedoen en was volgens die veiligheidsmaatskappy ernstig beseer.
Nooddienste het die man op die toneel behandel en hom gestabiliseer. Sy huis is glo geplunder en sy bakkie tydens die aanval gesteel. Die drie verdagtes is in hegtenis en bly in polisie-aanhouding hangende die voortgesette ondersoek.
Nuusflits het polisiekommentaar gevra.
