KWAZULU-NATAL. – ’n Gesin van vier is Maandagmiddag uit ’n dam gered nadat hul voertuig op die R34 by Bloedrivierpoort beheer verloor en van die pad af gegly het. Die voorval was een van sewe afsonderlike botsings waarop mediese spanne van KwaZulu Private Ambulance (KZPA) tussen 15:00 en 20:00 moes reageer te midde van reën, sneeu en gevaarlike padtoestande.
Craig Botha van KZPA sê die gesin se voertuig het in die dam beland, waarna gevorderde paramedici waterreddingstegnieke moes gebruik om al vier insittendes onder byna vriespunt-toestande uit die water te kry. Die gesin het nie net beserings opgedoen nie, maar moes ook vir hipotermie behandel word, nadat hulle vir ’n geruime tyd aan die koue water blootgestel was. Die ma het ernstige beserings opgedoen, waaronder vermoedelike frakture, terwyl die pa en hul twee kinders, ’n meisie van ongeveer 10 jaar en ’n 14-jarige seun, ligte beserings opgedoen het.
In nog ’n ongeluk op dieselfde deel van die R34 het ’n voertuig beheer verloor en omgeslaan. Al drie insittendes het ligte beserings opgedoen. In Vryheid het ’n bakkie in Kerkstraat beheer verloor en teen ’n boom gebots. Twee mense het ernstige beserings opgedoen, waaronder vermoedelike borsbeserings en frakture. Nog ’n botsing het op die N11 by Ingogo tussen twee voertuie plaasgevind. Drie mense het ligte beserings opgedoen.
KZPA se mediese spanne het al die beseerdes op die toneel gestabiliseer voordat hulle na hospitale in die omgewing vervoer is. Motoriste word intussen gemaan om uiters versigtig te bestuur terwyl die kouefront voortduur. Reën, sneeu en ysige toestande hou steeds ’n risiko op paaie in die streek in.
