GAUTENG. – Die korrupsieverhoor van Richard Mdluli, die voormalige hoof van misdaadintelligensie, en sy medebeskuldigdes is tot 15 September uitgestel nadat die verdediging die geldigheid van deursoekingslasbriewe wat tydens die ondersoek uitgereik is, betwis het.
Mdluli staan saam met Heine Barnard, voormalige voorsieningskettingbestuurder van die polisie, en Solomon Lazarus, voormalige finansiële hoof, tereg. Henry Mamothame, Idac-woordvoerder, sê die staat het sy hoofgetuienis deur sy eerste getuie afgehandel. Die getuie is ’n afgetrede ondersoeker van die direktoraat vir prioriteitsmisdaadondersoeke en die ondersoekdirektoraat teen korrupsie (Idac) en word tans deur die verdediging kruisondervra. Hulle word aangekla van korrupsie, bedrog en diefstal wat verband hou met die beweerde misbruik van die polisie se geheimediensrekening vir misdaadintelligensie tussen 2008 en 2012.
Die beskuldigdes het onskuldig gepleit op al die aanklagte. Die saak is uitgestel sodat die verdediging en die staat hul argumente oor die geldigheid van die deursoekingslasbriewe kan voorberei.
