Altesaam 24 voertuie is in Soweto en Durban aan die brand gesteek te midde van gewelddadige betogings oor die hantering van asielaansoeke en ’n uitspraak van die Konstitusionele Hof.
Lt.genl. Puleng Dimpane, die polisie se waarnemende nasionale kommissaris, het Donderdagaand (8 Oktober) bevestig dat 10 voertuie in Soweto en 14 in Durban aan die brand gesteek is. Drie buitelandse burgers is in KwaZulu-Natal in hegtenis geneem.
Dimpane waarsku dat persone wat by geweld en die vernietiging van eiendom betrokke is, in hegtenis geneem en vervolg sal word waar voldoende bewyse bestaan. Openbare orde-polisiëring is in brandpunte versterk en intelligensie word ingesamel om moontlike bedreigings te identifiseer.
Sy het gemeenskappe versoek om kalm te bly en nie die reg in eie hande te neem nie. Hoewel mense die reg het om vreedsaam te betoog, regverdig dit nie geweld, intimidasie of brandstigting nie.
Die Konstitusionele Hof het sekere bepalings van die Vlugtelingewet ongeldig verklaar omdat prosedurele vereistes sommige mense verhinder het om om asiel aansoek te doen. Die uitspraak wettig egter nie onwettige immigrasie nie, en asielaansoeke moet steeds volgens die wet beoordeel word.
Die regering ondersoek die uitspraak se implikasies, maar bly daaraan gebonde.
Druk hier en hier om meer te lees.
