NEPAL. – Minstens vyf mense word vermis nadat ’n vloed Sondag 11 Oktober deur die Budhi Gandaki-riviervallei in die Gorkha-distrik in Sentraal-Nepal is. Huise, brûe, paaie en infrastruktuur by ’n hidroëlektriese projek is beskadig of weggespoel. Meer as 100 buitelandse stappers is volgens berigte in die Manaslu-gebied gestrand nadat vloedwater staproetes en brûe beskadig het.
Die vloed het gevolg nadat ’n grondverskuiwing die rivier tydelik versper het en die opgehoopte water daarna deurgebreek het. Die nuwe vloed volg op twee vorige groot rampe.
Die Nepalese nasionale ramp-risikoverminderings- en -bestuursowerheid het inwoners langs die rivier gewaarsku om na hoër en veiliger gebiede te beweeg. Die Nepalese weermag en ander reddingspanne het met ontruiming en soektogte begin.
Volgens berigte was 96 mense, insluitend nege buitelanders, teen Maandag uit die geraakte gebiede gered. Die omvang van die skade word steeds bepaal, terwyl vyf inwoners nog vermis is. Brûe, paaie, hidroëlektriese fasiliteite en die lewensbestaan van honderde huishoudings is geraak.
Op 26 Augustus het ’n katastrofiese vloed ná ’n rots- en ysineenstorting naby die Nepal-China-grens die Bhote Koshi- en Trishuli-rivierstelsels getref. Die VN het later berig dat sowat 1 450 mense dood is en meer as 5 000 steeds vermis was.
Daarna het swaar reën tussen 24 en 27 September nuwe vloede en grondverskuiwings veroorsaak. Minstens 12 mense is in dié voorvalle dood en sewe is as vermis aangemeld. Die jongste ramp in Gorkha beklemtoon die voortgesette gevaar vir berggemeenskappe en mense wat langs riviere woon of deur die gebied reis.
Bronne: Verenigde Nasies, Associated Press, Nepali Times, The Kathmandu Post, National Disaster Risk Reduction and Management Authority Nepal
