Die onafhanklike verkiesingskommissie (OVK) gaan 32 politieke partye wat in ’n soortgelyke posisie as die ANC was, ook toelaat om aan die plaaslikeregeringsverkiesing op 4 November deel te neem. Dit volg nadat die konstitusionele hof beslis het dat 181 ANC-kandidate, waaronder 51 wykskandidate en 130 proporsionele verteenwoordigingskandidate, op die kandidaatlyste in ses munisipaliteite ingesluit moet word.
Die OVK het Vrydag aangekondig dat die hof se beslissing ook op die 32 ander partye van toepassing gemaak sal word om te verseker dat politieke partye regverdig behandel word. Die OVK sê die 32 partye het kandidate benoem wat aan die vereistes voldoen het en verkiesingsdeposito’s betaal het, maar nie hul finale kandidaatlyste ingedien het nie. Die kommissie het bevind dat dit onregverdig sou wees om hierdie partye uit te sluit, terwyl die ANC ingevolge die hofbevel toegelaat word om sy kandidate in te dien. Dertien ander partye kwalifiseer egter nie vir dieselfde toegewing nie, omdat hulle onder meer nie die vereiste deposito’s betaal het nie of nie aan die kieserslysregistrasievereistes voldoen het nie.
Volgens die OVK raak die besluit 107 munisipaliteite en beteken dit dat altesaam 33 miljoen stembriewe benodig word. Van dié getal is 27 miljoen reeds gedruk, terwyl ’n verdere 6,6 miljoen nog gedruk moet word. Die kommissie het die druk van stembriewe vir die ses munisipaliteite wat deur die ANC se hofsaak geraak is, uitgestel totdat die konstitusionele hof uitspraak gelewer het. Die OVK sê geen koste is dus aangegaan vir die stembriewe wat vir dié ses munisipaliteite bedoel is nie.
Die OVK sal die 32 partye kontak om te bevestig of hulle steeds aan die verkiesing wil deelneem. Indien wel, sal hulle ’n beperkte tyd kry om die kandidaatbenoemingsproses af te handel en, waar nodig, name op hul lyste aan te vul of te vervang. Die kommissie sê hy verwag nie tans dat die verwikkelinge die verkiesingsdatum sal verander nie, maar erken dat die logistieke voorbereidings nou binne ’n aansienlik korter tyd afgehandel moet word.
Druk hier om meer te lees.
