WES-KAAP. – Action Society sê 292 meisies tussen die ouderdom van 10 en 14 jaar het tussen April en Desember 2025 in die Wes-Kaap geboorte geskenk. Die organisasie sê dit behoort ernstige vrae oor kinderbeskerming en aanspreeklikheid te laat ontstaan.
Juanita du Preez, nasionale woordvoerder van Action Society, sê elke swangerskap waarby ‘n kind betrokke is, behoort as ‘n kinderbeskermingsaak hanteer te word. Sy meen sulke gevalle moet onmiddellik ondersoek word om vas te stel of seksuele misbruik, uitbuiting of ander misdrywe plaasgevind het. Volgens Du Preez is dit nie gewone tienerswangerskappe nie, maar kinders wat geboorte skenk. Die organisasie wil weet hoeveel strafregtelike ondersoeke ná dié swangerskappe ingestel is, hoeveel verdagtes geïdentifiseer en in hegtenis geneem is en hoeveel skuldigbevindings gevolg het.
Die organisasie is ook van mening dat kinders ouderdomstoepaslike kennis moet ontvang oor liggaamsveiligheid, gesonde grense, hoe om manipulasie te herken en waar om hulp te kry. Volgens Action Society beskerm stilte nie kinders nie, maar eerder die oortreders. Die organisasie sê ‘n stelsel wat ‘n kind se geboorte registreer sonder om die persoon verantwoordelik daarvoor te identifiseer, laat daardie kind twee keer in die steek.
Druk hier om meer te lees.
