VRYSTAAT. – Die polisie het Dinsdagoggend altesaam 52 skape, ter waarde van R120 000, teruggevind wat op die plaas Wolwepan gesteel is. Verdagtes is gearresteer.
Kapt. Stephen Thakeng sê vier verdagtes is vir die diefstal op die plaas in die Welkom-distrik gearresteer nadat ‘n saak by die Odendaalsrus-polisie gemaak is.
Lede van Welkom-blitspatrollie het omstreeks 04:00 Jasonstraat in Riebeeckstad gepatrolleer. ‘n Maroenkleurige Mazda met Gauteng-nommerplate, met ‘n sleepwa, asook ‘n wit Toyota Hilux-bakkie met Vrystaat-nommerplate en ‘n sleepwa, wat beide skape opgelaai het, is opgemerk.
“Aangesien dit verdag gelyk het, is beide voertuie gestop en vervoerpermitte is gevra. ‘n Lid van die Odendaalsrus- eenheid vir veediefstal en bedreigde spesie is na die toneel ontbied.”
Voorlopige ondersoek het die diefstal aan die lig gebring, waarna die verdagtes vir die besit van vermoedelik gesteelde lewende hawe gearresteer is.
Die verdagtes sal binnekort in die Welkom-landdroshof verskyn.
