’n Vier dae oue baba is onder ’n bos in Malmesbury gevind, nadat ’n inwoner huilgeluide gehoor het.’n Saak van kinderverlating is geopen, ‘n Vroulike verdagte is in hegtenis geneem en het Woensdag in die plaaslike landdroshof verskyn. Die saak is uitgestel, maar sy bly in aanhouding. Intussen word babas wat in bababokse geplaas word, suksesvol sonder vervolging in die maatskaplike sisteem vir moontlike aanneming opgeneem.
Kapt. Frederick van Wyk sê aan Nuusflits volgens die inwoner van Malmesbury het haar man reeds Vrydagaand ’n baba hoor huil, maar gedink dit kom van haweloses in die gebied. Toe hulle die gehuil Saterdagaand weer hoor, het sy uitgegaan en die baba onder ’n bos oorkant hul huis ontdek. Die baba is vir mediese behandeling na die Swartland-hospitaal geneem. ’n Saak van kinderverlating is geopen en word deur die kinderbeskermingseenheid ondersoek. Maandagoggend het die polisie met ‘n soektog na die baba se ma begin, wat hulle tot in Fisantekraal geneem het. ‘n Vrou (25) is Dinsdag in Rholihlahlastraat, Ilingelethu, in hegtenis geneem.
Sy het Woensdag in die Malmesbury-landdroshof voorgekom en bly tot haar borgtogaansoek op 4 Desember in aanhouding. Van Wyk sê die ondersoek is steeds aan die gang. Die deurbraak is Woensdag gemaak, aan die begin van die 16 Dae van Aktivisme-veldtog, vir die bewusmaking van misdade wat teen vroue en kinders gepleeg word, gemaak.
Bababokse, waarin mammas hulle babas veilig kan sit, word strategies geplaas sonder dat hulle vervolging hoef te vrees. Daar is egter ‘n regstryd aan die gang om die bababokse aktief te hou. Rock of Hope vra dat daar gewerk moet word om die bababokse te kan behou, aangesien dit babalewens red. Baby Savers SA
Rock of Hope Place of Safety is in Pretoria geleê. In ‘n sosialemediaplasing het hulle gesê ’n babameisie is Woensdag veilig in die bababoks by die organisasie geplaas. Personeel het die baba slapend en in ’n stabiele toestand aangetref. Sy is onmiddellik in hul sorg opgeneem. Rock of Hope sê hulle is dankbaar dat die kind veilig gelaat is en dat sy nou in ’n beskermde omgewing is. Die organisasie het ook ’n boodskap vir die baba se mamma dat die kleinding versorg en veilig is. Die maatskaplike proses sal nou volg om te bepaal wat die baba se langtermynplek van veiligheid sal wees. Gedurende Oktober is ‘n hele paar babas in dié bababoks geplaas.
Op Sondag 26 Oktober is ‘n pasgebore baba by ‘n plaaslike kerk gelaat, wat deur Rock of Hope vir versorging opgeneem is. Die “Pappa van Rock of Hope, genaamd Wouter” het die baba gered wat nou as “Baby P” bekend staan. Daar was nog twee soortgelyke voorvalle in dieselfde week. Rock of Hope het ’n beroep op die publiek gedoen om vir die mammas te bid en hulle te ondersteun. “Baie van hierdie mammas weet nie waarheen om te gaan nie of ontvang nie die nodige ondersteuning nie,” het die organisasie gesê. Al die sake word aan by relevante welsynsowerhede vir verdere ondersoek aangemeld.
Op 23 Oktober het die bababoks se alarm afgegaan oor ‘n babaseuntjie. Die organisasie het die mamma gerusgestel dat die baba veilig en geliefd is. Voorbidding is vir baba “L” gevra.
Op 17 Oktober, omstreeks 16:00, is nog ‘n babaseuntjie die geskenk van lewe gegee toe hy in die Rock of Hope-bababoks geplaas is. Dit was tot op dié betrokke datum die sesde baba wat in die veilige bababoks geplaas is. Hy is die 282ste baba van die organisasie, maar hulle sê baba “J’ is soos al die ander babas “eerste in hulle harte”.
Sommige van die Rock of Hope-babas wat in die babakas geplaas is:
