BARBERTON, MPUMALANGA. – Sakkie en Yvonne Dednam is Woensdag deur ’n jong kameelperdbul op die Greenstone-wildlandgoed aangeval.
Hulle het na bewering, soos wat hulle gewoonte is, op die landgoed waar hulle bly, met hulle honde gaan stap. ’n Jong kameelperdbul het glo op hulle afgestorm en hulle geskop en vertrap. Die honde het tydens die aanval weggehardloop.
Volgens hulle seun, Eduard, kon Sakkie daarin slaag om onder ’n bos skuiling te soek. Yvonne kon egter nie en het kopbeserings en harsingskudding opgedoen. ’n Paar van Sakkie se ribbes is tydens die voorval gebreek.
Gerhard Bessenger, ondervoorsitter van die landgoed se raad, het die voorval bevestig en die nooddienste geprys vir hulle vinnige optrede.
Bronne: Caxton News, SA People News
