NOORD-KAAP. – Die Noord-Kaapse polisie het ‘n beloning aangebied vir inligting wat sal lei tot die inhegtenisneming en veroordeling van ‘n skuldige persoon in die soeke na David Waterboer (14) wat sedert 7 Februarie 2025 vermis is.
Volgens polisiewoordvoerder, kol. Cherelle Ehlers, is Waterboer op die betrokke dag, kort voor 11:00, deur sy ma gesien voordat sy werk toe is. Waterboer was op pad na ‘n sportbyeenkoms in Concordia en was in ‘n swart kortbroek, swart T-hemp en donkerblou sandale geklee. Daar is voorheen deur die polisie gesê Waterboer is by die atletiek en die Saterdag voor 07:00 by ‘n busstop opgemerk.
Speurders van die ondersoekeenheid vir provinsiale georganiseerde misdaad, saam met die eenheid vir gesinsgeweld, kinderbeskerming en seksuele misdrywe van Springbok, asook die Springbok- en Nababeep-polisie, soek steeds onverpoosd na David. Enigiemand met relevante inligting kan kol. Browers by 082 447 1829 of sers. Mpasa by 083 690 4790 bel.
