KWAZULU-NATAL. – Vyf lede van die KwaZulu-Natalse Haaieraad (Sharks Board) is Vrydagoggend beseer toe hulle op Isipingostrand, suid van Durban, in ‘n bootongeluk was.
Garrith Jamieson van ALS Paramedics sê vyf persone het verskeie beserings opgedoen en is op die toneel gestabiliseer voordat hulle vir verdere mediese behandeling na ‘n hospitaal vervoer is.
“Daar word vermoed die insittendes was op see besig om te oefen toe hul vaartuig omgeslaan en al die insittendes in die water geval het. Almal is gered en is na die wal gebring toe paramedici opgedaag het.”
Jamieson sê alle owerhede was op die toneel en stel verder ondersoek in.
Lifesaving South Africa sê hulle is verlig nadat al vyf lede van die Haaieraad veilig is en behandeling ontvang het.
“Ons dank gaan uit aan eThekwini-lewensredders, noodpersoneel en almal wat gehelp het met die redding-en-herstelpogings. Die Haaieraad speel ‘n deurslaggewende rol om die veiligheid van ons oseaangebruikers te verseker. Ons is dankbaar vir hul toewyding en verlig dat almal die nodige mediese aandag ontvang.”
