GAUTENG. – Xolane Qhubeke (37) het Maandag op aanklagte van aanranding en roekelose bestuur in die Nigel-landdroshof verskyn. Hy het na bewering ‘n 18-jarige matriekmeisie in ‘n voertuig wat leerlinge vervoer het, geklap toe sy ‘n handrem wat hy losgemaak het, opgetrek het.
Lumka Mahanjana, woordvoerder vir die NVG, sê die insident het op 10 April gebeur en hierdie was Qhubeke se eerste hofverskyning. Na bewering was die matriekmeisie ‘n insittende van ‘n voertuig wat leerlinge na en van die skool vervoer het. Die beskuldigde in ‘n ander voertuig het aan die verkeerde kant van die pad gery en het die voertuig waarin die meisie ‘n passasier was, blokkeer.
‘n Rusie het tussen die twee bestuurders ontstaan waar hulle buite die voertuie gestaan het. Tydens die rusie het Qhubeke in die skoliervervoer ingeleun en die handrem losgemaak. Die matriekmeisie wat in die voertuig was, het die handrem weer opgetrek. Qhubeke het haar glo toe verskeie kere geklap. Die matriekmeisie het die insident by die polisie aangemeld, waarna die beskuldigde Saterdag gearresteer en op borg vrygelaat is.
Die saak is vir regsverteenwoordiging tot 22 April uitgestel.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by nuus@nuusflits.com
