MPUMALANGA. – Emmanuel Mkhabela en Eckson Mkhonto is elkeen deur die Pretoria-landdroshof op R80 000 borgtog vrygelaat. Hulle is staatsamptenare wat van moord op Mabidi Mashaba, ’n forensiese navorser, aangekla word.
Tshegofatso Makhudu, NVG-woordvoerder, sê Mkhabela, ’n protokolbestuurder in die kantoor van die premier in Mpumalanga, en Mkhonto, ’n keuringsbeampte in dieselfde kantoor, staan tereg op aanklagte van moord met voorbedagte rade, sowel as die onwettige besit van ’n vuurwapen en ammunisie. Mashaba het as ‘n forensiese navorser vir die provinsiale regering gewerk.
Volgens die polisie het die voorval op 7 September 2023 plaasgevind toe die oorledene op pad van Mpumalanga na Pretoria was. In Villieria in Pretoria het ’n voertuig met die twee beskuldigdes glo langs sy voertuig gery en verskeie skote geskiet. Mashaba het later aan sy beserings beswyk. Een van die beskuldigdes is by ’n gastehuis in Mpumalanga in hegtenis geneem, terwyl die ander homself aan die polisie oorgegee het.
Die hof het borgtog onder streng voorwaardes toegestaan, insluitend dat die beskuldigdes nie met staatsgetuies mag kontak maak nie. Die saak is tot 6 Augustus 2026 uitgestel.
