GAUTENG. – Dimakatso Papo (30) en Lebohang Mokgadi (24) is Donderdag deur die Valke vir beweerde matrieksertifikaatbedrog in Johannesburg gearresteer. Beide is Maandag deur die Johannesburg-landdroshof op borg vrygelaat.
Lt.kol. Lloyd Ramovha van die Valke sê ‘n oplettende polisiebeampte het verdagte optrede by ‘n internetkafee in Sentraal-Johannesburg opgemerk. Die beskuldigdes was glo besig om die resultate op ‘n matrieksertifikaat van 2014 te verander. Die verandering is gemaak om ‘n universiteitstoelatingskwalifikasie te weerspieël.
Ramovha bevestig daar is vir verdere ondersoek op elektroniese toerusting en ‘n selfoon beslag gelê. Die beskuldigdes is elk borg van R500 toegestaan. Die saak is vir die verdere ondersoek tot 7 April uitgestel.
