KWAZULU-NATAL. – Die bestuurder van ‘n bakkie is vanoggend (Vrydag) in Marine-rylaan ernstig beseer toe ‘n boomtak deur die voorruit gebars het. Hy het ernstige kop- en borsbeserings opgedoen.
Volgens Craig Botha van KwaZulu Private Ambulance Service is nooddienste omstreeks 10:30 na die toneel ontbied. ’n Ongeluk, waarby ’n verbygaande motoris en instandhoudingswerkers betrokke was, is aangemeld.
Die ongeluk het plaasgevind terwyl werkers bome langs die pad gesnoei het. ‘n Groot tak het losgebreek en op die verbygaande bakkie geval. Die impak was so sterk dat die tak die voorruit deurboor en die bestuurder getref het.
Paramedici het onmiddellik noodbehandeling aan die enigste insittende verleen. Hy is op die toneel gestabiliseer voordat hy met begeleiding van gevorderde lewensondersteuning na ’n nabygeleë hospitaal geneem is.
Die voorval het groot verkeersopeenhopings veroorsaak toe een baan vir ’n geruime tyd gesluit moes word. Brandweer- en wetstoepassingsbeamptes was op die toneel om veiligheid te verseker, rommel te verwyder en verkeer te beheer. Die presiese omstandighede van die boomtak wat losgebreek het, word ondersoek.
