LIMPOPO. – ‘n Man (31), die bestuurder van ‘n voertuig, wat Maandagaand in Atok deur ‘n oorstroomde rivier meegesleur is, word steeds deur die Apel-polisiekantoor gesoek. Die voertuig is reeds gevind.
Kol. Malesela Ledwaba sê in ‘n verklaring ‘n passasier in dieselfde voertuig kon homself red en het mediese behandeling ondergaan. Hy is reeds ontslaan. Toe die voertuig opgespoor is, kon daar aanvanklik weens gevaarlike weerstoestande nie daarby uitgekom word nie.
Lt.genl. Thembi Hadebe, die provinsiale polisiekommissaris, het almal wat by die soekoperasie betrokke is, bedank en die publiek gewaarsku om tydens swaar reën versigtig by riviere te wees.
