GAUTENG. – Twee verdagtes, vermoedelik blouligrowers, is Woensdag deur die Benoni K9-eenheid op die R103/R550 buite Heidelberg gearresteer.
Kol. Dimakatso Nevhuhulwi sê die honde-eenheid was besig met patrollie toe hulle ‘n VW Polo met vier insittendes voorgekeer het. Tydens deursoeking van die voertuig het twee van die insittendes ‘n veld in gehardloop. In die kattebak van die Polo het die polisielede op ‘n polisie-uniform, blou ligte en ‘n sirene afgekom. Die twee oorblywende insittendes is in hegtenis geneem. Tydens die voorlopige ondersoek is bevind die Polo is in November 2024 in Eldorado Park as gesteel aangemeld.
Die polisie se ondersoek duur voort met die soek na die ander twee verdagtes. Die twee verdagtes in aanhouding sal binnekort op aanklagte van die voordoen as ‘n polisiebeampte en die besit van gesteelde eiendom in die Heidelberg-landdroshof voorkom.
Lt. genl. Tommy Mthombeni het die lede van Benoni K9 vir die suksesvolle inhegtenisnemings geprys.
