GAUTENG. – Na ‘n video van ‘n ma wat sê haar dogter word glo by Hoërskool Sutherland geboelie, sosiale media op horings geneem het, sê Die LUR, Matome Chiloane, vir die onderwysdepartement, die insident bekommer hom.
Steve Mabona, woordvoerder vir die departement, sê volgens inligting tot die departement se beskikking het die ma van ‘n gr. 10-leerling wat glo deur ‘n medeleerling wat ook in gr. 10 geboelie is, die skool in Centurion, Woensdag besoek om die insident aan te spreek. Die skool het verduidelik ‘n voorlopige ondersoek sal gedoen word om die beweringe te ondersoek, alvorens enige dissiplinêre aksie ingestel word.
Mabona bevestig voorts ‘n vergadering is Donderdag met die slagoffer en haar ouers, die skoolbestuur en distriksbeamptes gehou. Daar is bevestig die skool gaan ‘n dissiplinêre verhoor instel wanneer beide ouers beskikbaar is, om hulle deel van die proses te maak. Die departement het ook sielkundige ondersteuning aan beide die leerlinge en ouers beskikbaar gestel. Ondersoek sal ook gedoen word oor hoe ‘n opvoeder die klagte hanteer het.
