MPUMALANGA. – ‘n Boer (30) wat glo vir sy diere vervalde kos van kettingwinkels verkry en dan na bewering vir menslike gebruik herverpak vir verkoop, verskyn vandag op aanklagte in die Secunda-landdroshof.
Lt.kol. Magonseni Nkosi sê die Valke in Secunda en Charl Cilliers-polisiestasie het inligting ontvang dat die boer na bewering die vervalde kos van kettingwinkels en ander verspreiders kry. Die kos-items word glo dan op die plaas herverpak en weer na handelaars versprei.
Die plaas is saam met die Govan Mbeki- plaaslike munisipaliteit se gesondheidsinspekteurs besoek. Twee pakhuise, vier koelkamers, ‘n vragmotor met ‘n verkoelingseenheid toegerus, vrieskaste en twee afleweringsvoertuie met produkte is ontdek. In die twee pakhuise was verpakte kos wat nie vir menslike gebruik geskik is nie. Produkte waarvan die vervaldatums al verstryk het, soos geblikte produkte, rooivleis, hoender, omtrent 1 000 kratte met suiwelprodukte, ook kaas, was in die vier koelkamers. Altesaam sewe vrieskaste, waarin verpakte koring en mieliemeel geberg word, is in die pakhuise gekry. Nkosi sê voorts is ‘n vragmotor met ‘n verkoelingseenheid en twee ligte afleweringsvoertuie, een gelaai met vleis en die ander leeg, is ook gevind. Die ondersoek van die voertuie duur voort.
Herverpaktoerusting om items onder meer vakuum te verpak en van pryse te voorsien, is ook gevind.
