KWAZULU-NATAL. – ‘n Britse toeris (47) het Maandag op ‘n afgeleë strand in die Cape Vidal-natuurreservaat verdrink.
Volgens ‘n verklaring van die NSRI het die spanne aan diens ‘n noodoproep van Ezemvelo-wildbewaarders oor ‘n verdrinking ontvang. Die NSRI met reddingswemmers het met ‘n reddingsvoertuig en -vaartuig na die toneel vertrek. KZN Private Ambulance-dienste het ook bystand verleen.
Die toeris kon deur die reddingswemmers uit die branders gehaal word, maar hy was reeds oorlede.
“Die liggaam van die man is in die sorg van die polisie en staatsgesondheid se forensiese patologiedienste geneem.”
‘n Geregtelike doodsondersoek is deur die polisie geopen.
Dit lyk asof die man op toer in die Cape Vidal-natuurreservaat was. Hy het gaan swem en in die branders in die moeilikheid geraak, waarna hulp ontbied is.
