KWAZULU-NATAL. – ’n Voetganger is Vrydag dood toe hy op die R102, tussen die Palmview-robotte en die Phoenix-afrit, van ‘n roof probeer vlug het en deur ’n voertuig getref is.
KZN VIP Protection Services het op ’n noodroep gereageer en die toneel beveilig waar die liggaam van die oorledene op die besige padoppervlak aangetref is. Die insident het verkeer ernstig beïnvloed. Kort daarna het ontroerde inwoners van Cornubia, van wie sommige met pangas en ander voorwerpe bewapen was, opgedaag. Hulle het verduidelik die oorledene is ‘n plaaslike broodwinner, wat saam met ander van die werk af gestap het toe drie onbekende manlike verdagtes hulle probeer beroof het. Volgens die inligting het die groep in ’n poging om te probeer vlug die pad probeer oorsteek, waartydens die oorledene deur ’n aankomende voertuig getref en op die toneel dood is.
KZN VIP Ambulansdienste, Metro-polisie en SAPD was op die toneel. Die Suid-Afrikaanse Polisiediens ondersoek tans die omstandighede rondom beide die poging tot roof en die noodlottige botsing.
KZN VIP Protection Services sê inwoners van Cornubia doen nou ’n beroep op die polisie en munisipale owerhede vir dringende ingryping. Hulle verwys na aanhoudende probleme soos toegegroeide bosse, ’n gebrek aan straatligte en gereelde aanvalle op werkers wat deur die gebied pendel – toestande wat volgens hulle ’n daaglikse omgewing van vrees en gevaar geskep het.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
