Volgens ‘n onderhoud met ABC is Bruce Willis se algemene gesondheid volgens Emma Heming Willis, sy vrou, goed, alhoewel die wêreldberoemde akteur se brein en spraakvermoë besig is om agteruit te gaan. Die 70-jarige akteur is gedurende 2022 met afasie gediagnoseer en later met frontotemporale demensie.
“Bruce is steeds baie beweeglik en oor die algemeen geniet hy goeie gesondheid. Dit is net sy brein wat hom faal,” het sy verduidelik. Sy vertel dat die gesin geleer het om aan te pas en op ander maniere met hom te kommunikeer.
Heming Willis sê die eerste simptome was ontstellend, aangesien haar man – bekend vir sy warmte en geselligheid – stiller en teruggetrokke geraak het. Tog ervaar die gesin steeds kort oomblikke waar sy persoonlikheid deurskyn.
Heming Willis, wat in 2009 met die akteur getrou het, publiseer op 9 September haar boek Unexpected Journey: Finding Strength, Hope and Yourself on the Caregiving Path.
Bronne: The Guardian, Page 6 en EW.com
