LIMPOPO. – Die Demokratiese Alliansie (DA) het Woensdag die familie van Bontle Ramapuputla (5), wat op 30 Maart 2026 in ’n onvoltooide puttoilet gesterf het, besoek om hul meegevoel te betuig.
Rdl. Portia Moropane sê die tragedie het in die Mopani-distriksmunisipaliteit (MDM) plaasgevind toe ’n kontrakteur aangestel is om puttoilette in Hlohlokwe-dorp te bou, maar glo die projek verlaat het voordat dit voltooi is. Boumateriaal is by die familie se huis agtergelaat en inwoners is aan gevaarlike, onvoltooide strukture blootgestel.
Moropane sê hierdie verlies van ’n kind kon voorkom word en wys op swak projekbestuur, die aanstelling van onbevoegde kontrakteurs en ’n gebrek aan sorg vir mense se lewens.
Die DA herinner ook aan vorige insidente, soos ’n kleuter wat in 2018 in ’n ongebruikte boorgat geval het en ’n sesjarige seun wat in 2019 in ’n sloot van die Giyani-waterprojek verdrink het.
Die DA gaan aan Basikopo Makamu, die LUR vir COGHSTA, skryf om die saak dringend te ondersoek, verantwoordelike amptenare strafregtelik aan te spreek en alle ongebruikte putte, slote en mangate van die projek onmiddellik toe te maak om kinders se lewens te beskerm. Moropane sê geregtigheid vir hierdie voorkombare tragedie is nie onderhandelbaar nie en as die LUR nie optree nie, sal die DA self stappe neem.
