GAUTENG. – Die DA eis dat die Gautengse departement van e-regering verduidelik waarom ’n universiteitstudent moontlik deur strafregtelike stappe in die gesig gestaar word nadat hy ’n veiligheidsprobleem met die provinsie se e-Panic Button-toepassing onder die aandag gebring het.
Volgens die DA het Joel Cedras ontdek dat ’n onbeskermde databasis sensitiewe inwonersinligting, waaronder name, kontakbesonderhede en GPS-ligging, toeganklik gemaak het. Die toepassing vorm deel van ’n projek van R269 miljoen. Michael Waters, die DA se Gautengse woordvoerder vir onderwys, sê die LUR, Bonginkosi Dhlamini, moet die rede vir die moontlike strafklag verduidelik en bevestig of ’n saak geregistreer is.
Die DA sê die departement het tydens ’n gesamentlike vergadering van die Gautengse wetgewer se portefeuljekomitees op 5 Oktober aangedui dat die polisie oor ’n moontlike strafsaak genader is. Dit vra ook vir ’n onafhanklike ondersoek om vas te stel hoe die veiligheidsprobleem ontstaan het, hoe lank die inligting blootgestel was en of ongemagtigde persone toegang daartoe verkry het.
Portefeuljekomitees van die Gautengse wetgewer het ook op ’n onafhanklike ondersoek aangedring. Die departement het egter vroeër gesê die veiligheidsprobleem is vinnig aangespreek en dat geen inwoners se persoonlike inligting as gevolg van die voorval gekompromitteer is nie. Die omvang van die moontlike blootstelling en of ongemagtigde toegang plaasgevind het, moet nog deur ’n onafhanklike ondersoek uitgeklaar word.
Die e-Panic Button is ’n veiligheidstoepassing van die Gautengse provinsiale regering wat inwoners kan gebruik om hulp te ontbied wanneer hulle in gevaar is of ’n noodgeval ervaar. Die idee is dat ’n gebruiker ’n noodsein deur die toepassing kan stuur sodat hulpdienste of die toepaslike veiligheidsreaksie ontplooi kan word.
Bronne: DA Gauteng, Gautengse wetgewer, SAnews
