NOORD-KAAP. – Twee verdagtes (33) is in hegtenis geneem nadat Steinkopf-polisiebeamptes glo ‘n daggabesending met ’n geskatte straatwaarde van R7,7 miljoen tydens roetinepatrollies by hulle gevind het.
Volgens kapt. Ivan Magerman, polisiewoordvoerder, is ‘n verdagte bakkie met bokse agter op in die vroeë oggendure by die N7-R382-kruising opgemerk. Tydens deursoeking is daar op dagga van 64,8 kilogram afgekom.
Die verdagtes is in hegtenis geneem en sal binnekort op aanklagte van handel in dwelms in die hof verskyn. Die polisie het ook op die voertuig beslag gelê.
Brig. Schalk Andrews, die distrikskommissaris, het die beamptes vir hulle vinnige optrede geprys. Hy sê die suksesvolle optrede wys die polisiediens se volgehoue verbintenis om dwelmhandel en soortgelyke misdade in die Namakwa-distrik te bekamp.
