Die voorgestelde Wetsontwerp op die Beheer van Tabakprodukte en Elektroniese Damprooktoestelle, wat tans voor die parlement is, beoog om die gebruik en verkope van tabak- en dampprodukte streng te reguleer. Die wetsontwerp sluit in ’n verbod op gegeurde produkte, streng beperkings op advertensies, asook ’n ouderdomsbeperking van 18 jaar.
Mike Bolhuis van Specialised Securtity Services sê die wetsontwerp is reeds in Desember 2022 na die portefeuljekomitee oor gesondheid verwys, waar openbare insette oorweeg word. Die komitee het op 11 November die nuutste openbare voorleggings bespreek, en oorweeg om ’n nuwe sosio-ekonomiese impakstudie te laat doen nadat die vorige een as verouderd beskou is. Volgende stappe in die proses sluit in ’n stemming in die Nasionale Vergadering, waarna die wetsontwerp na die Nasionale Raad van Provinsies sal gaan vir verdere openbare deelname. As dit goedgekeur word, sal dit vir presidensiële goedkeuring voorgelê word.
Die kernvoorstelle in die wetsonderwerp is onder meer:
- 100% rookvrye openbare plekke, binne- en sekere buite-lokale.
- Regulering van vapes vir die eerste keer.
- Eenvormige, eenvoudige verpakking met gesondheidswaarskuwings. Verbod op vertoon van produkte en verkoop deur verkoopmasjiene.
- ’n Totale verbod op advertensies, promosies en borgskappe.
Gesondheidsorganisasies soos Cansa en die National Council Against Smoking druk vir die dringende aanvaarding van die wetsontwerp en verwys na ’n groeiende openbare gesondheidskrisis, veral onder die jeug. Inisiatiewe soos Protect Our Next, skooluitreike en jeuggeleide optogte speel reeds ’n aktiewe rol in bewusmaking. Damprook- en tabakprodukte mag nie aan persone onder 18 verkoop word nie en Bolhuis sê die bedryf se eie verenigings, soos VPASA (Vapour Products Association of SA), bevorder streng ouderdomsverifikasie. Intussen is belasting op dampprodukte verhoog om gebruik onder jongmense te ontmoedig.
Die wetsontwerp word as een van die grootste openbare-gesondheidsingrypings van die afgelope dekade beskryf. Indien dit wet word, kan dit die risiko vir jongmense en kwesbare gemeenskappe beduidend verminder en Suid-Afrika nader aan internasionale standaarde bring.
Druk hier om Mike Bolhuis se volledige verklaring te lees. Druk hier om die voorgestelde wetsontwerp te lees.
Lees ook hier onder:
