WES-KAAP. – Daniel Smit (58) is in die Vredendal-rondgaande hof op alle aanklagte wat die staat teen hom gebring het, skuldig bevind. Jerobejin van Wyk (13) het op 2 Februarie 2022 gesterf toe Smit sy nek in ‘n oogwink gebreek het.
Eric Ntabazalila van die NVG sê Smit is aan poging tot moord, ontvoering, moord met voorbedagte rade, lykskending en regsverydeling skuldig bevind.
Smit het voorheen op vyf aanklagte, insluitend roekelose bestuur en moord, wat nie met voorbedagte rade gepleeg is nie, skuld beken.
“Ons het sy pleidooie verwerp en die aanklagte wat ons teen hom gebring het, wat poging tot moord en moord met voorbedagte rade insluit, voortgesit. Die staat was vanoggend suksesvol in sy saak. Regter HM Slingers het Smit op die aanklagte wat die staat teen hom gebring het, skuldig bevind.”
Argumente ter versagting van sy vonnis word tans aangehoor. Ntabazalila sê mnr. Van Zyl, ‘n sielkundige, is as eerste getuie geroep.
Ntabazalila verduidelik soos volg: “Smit het op roekelose bestuur en moord skuld beken, maar hy is deur die staat van poging tot moord in plaas van roekelose bestuur aangekla. Hy het skuld beken op moord, maar ons het moord met voorbedagte rade verkies. Ons het suksesvol gestry en hy is skuldig bevind aan poging tot moord en moord met voorbedagte rade. Die belangrikheid van moord met voorbedagte rade is dat dit ‘n vonnis van lewenslange gevangenisstraf tot gevolg kan hê. Dit is die verskil.”
Nuusflits het berig Smit het ‘n volledige pleitverklaring afgelê waarin hy skuld beken het vir die gebeure. Hy het beken hy het die seun, wat ná beweerde vrugtediefstal saam met ‘n maat, vir hom weggehardloop en hom glo getart het eers met sy voertuig raakgery, voordat hy hom ontvoer en vermoor het.
By sy huis in Matzikamastraat 19 het hy in die motorhuis parkeer en die deur toegemaak. Jerobejin, wat regop gesit het, is beveel om kombuis toe te gaan. Smit was steeds kwaad, maar omdat die seun bang gelyk het, het hy vir hom ‘n toebroodjie en koeldrank gegee.
Smit het verduidelik sy betrokkenheid by okkultiese rituele en satanisme tydens sy weermagdae het ‘n invloed op sy optrede gehad. Hy het na die etende seun geloop en sy nek met ‘n vinnige beweging gebreek. Smit sê die aksie was nie met voorbedagte rade uitgevoer nie. Hy het geweet Jerobejin was dood en sy liggaam moes weggesteek word, aangesien sy dogter agter ‘n geslote deur in die huis klas gegee het. Sy moes nie die seun se liggaam sien nie, daarom het hy Jerobejin se liggaam in die vrieskas gesit.
Smit het sy dogter, wat olik gevoel het, met slaappille bed toe gestuur en met teerpale ‘n vuur in die vuurherd gemaak. Hy het in die okkulte geleer so ‘n vuur word so warm soos ‘n verassingsoond. Smit het Jerobejin se liggaam daarna uit die vrieskas gehaal en dit geskend en verbrand. Dele wat nie gebrand het nie, is in ‘n blou drom en in die drein gesit.
Volgens Smit het hy daarna alleen en gevoelloos gevoel en het ‘n lang tyd op die stoep deurgebring. Hy het die okkulte in 2000 gelos toe sy seun gebore is en hy glo gevra is om sy seun te offer. Hy het besef hy het onbewustelik teruggekeer na die donker praktyke toe hy Jerobejin vermoor het.
Die aand het die polisie vir Jerobejin kom soek en Smit het gesê hy is vort nadat hy hom kos gegee het. Hy het regsverydeling erken. Smit het met die inhoud en akkuraatheid van die verslag van die nadoodse ondersoek, wat op 1 Desember 2022 deur dr. B Swiegelaar gedoen is, saamgestem.
Smit is die dag na die moord op ‘n aanvanklike aanklag van ontvoering gearresteer. Toe hy op 7 Februarie in die hof voorkom, is verskeie aanklagte bygevoeg.
Smit het egter aan die polisie vertel hy het die oorledene by sy huis kos gegee, waarna hy glo verdwyn het. Menslike oorskot is later deur die polisie in ‘n drein op Smit se erf gevind, wat deur DNS-toetse aan die oorlede seun verbind is.
Smit was vir waarneming na die Valkenberg Psigiatriese Hospitaal verwys waar hy geskik verklaar is om verhoor te word.
Foto: NVG
