KWAZULU-NATAL. – ‘n Deurbraak is gemaak in die saak van poging tot moord op adv. Coreth Naudé, toe sy op 18 Julie drie keer geskiet is. Twee verdagtes wat met die misdaad verbind is, is in aanhouding.
Kol. Robert Netshiunda sê op die betrokke dag het twee verdagtes Naudé by die ingang van ‘n hotel in Umhlanga, noord van Durban, geskiet. Naudé het by die hotel ingery toe sy deur die verdagtes in ‘n lokval gelei en geskiet is. Die advokaat het daarin geslaag om tot in die hotel te ry, waar sy mediese hulp ontvang en daarna na ‘n hospitaal gehaas is.
Netshiunda sê die verdagtes het in ‘n silwerkleurige Toyota Corolla van die toneel gevlug.
Die poging tot moord is deur die provinsiale eenheid vir ernstige en geweldsmisdaad ondersoek. Leidrade is opgevolg, wat die ondersoek na die Wes-Kaap gelei het.
Volgens Netshiunda is twee verdagtes, 28 en 29 jaar oud, Dinsdag 17 Desember onderskeidelik in Mitchells Plein en Milnerton gearresteer. Beide het in die Durban-landdroshof op aanklag van poging tot moord verskyn.
