OOS-KAAP. – Drie gewapende verdagtes is vanoggend (Vrydag) omstreeks 10:00 tydens ‘n skietgeveg met die polisie se taktiese reaksiespan (TRT) by ‘n huis in Nkawukazi, Ngqeleni, doodgeskiet.
Brig. Nobuntu Gantana, polisiewoordvoerder, sê in ‘n verklaring aan Nuusflits die TRT het ’n veiligheidsmaatskappy ondersteun wat ’n leidraad oor ’n gesteelde voertuig opgevolg het. Tydens hul benadering van die perseel is daar na die polisie van binne die huis geskiet. Die polisie het uit selfverdediging teruggeskiet. Ná die skietgeveg en deursoeking van die perseel is die drie verdagtes dood aangetref.
Geen polisielede is beseer nie. Vier gewere en plofstof is op die toneel gevind. Twee voertuie is ook op die erf aangetref, insluitend die voertuig waarna die veiligheidsmaatskappy gesoek het.
Gantana sê alle relevante rolspelers is ontbied en die toneel is deur PKRS vir leidrade gefynkam. Opod, die onafhanklike polisie-ondersoekdirektoraat, het oorgeneem soos deur wetgewing vereis word. Verdere besonderhede sal volg soos die ondersoek vorder.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
