ArcelorMittal Suid-Afrika (Amsa) gaan moontlik ongeveer 3 500 werknemers afdank, wanneer staalproduksie aan die einde van die maand in Newcastle en Vereeniging gestaak word.
Tami Didiza, woordvoerder van die maatskappy, sê in ‘n verklaring die maatskappy het ‘n finansiële verslag en planne om produksie by sekere van sy takke te staak, bekend gemaak. Van die probleme wat geopper is en tot die sluiting van Amsa se langstaalfabrieke gelei het, is swak ekonomiese groei, hoë logistieke en elektrisiteitskostes, asook veral ‘n toestroming van laekoste-staalinvoere vanaf China.
Die langstaalfabrieke te Newcastle en Vereeniging is as onvolhoubaar beskryf, aangesien ArcelorMittal se versoek om hulp van die regering nie die gewenste uitwerking gehad het nie.
“Dit is met diepe spyt dat ons hierdie moeilike besluit moet neem. Oor die afgelope jaar het ons werknemers en toegewyde bestuurspan merkwaardige toewyding en veerkragtigheid in die lig van ernstige onsekerheid getoon. Ongelukkig, ten spyte van almal se beste pogings, insluitend aansienlike betrokkenheid met belanghebbendes, is die strukturele uitdagings in die langstaalbesigheid nie opgelos nie. Alhoewel hierdie uitkoms baie teleurstellend is, veral gegewe die ekonomiese uitdagings wat Suid-Afrika in die gesig staar, bly ons gefokus op beveiliging en ‘n volhoubare toekoms vir die oorblywende bedrywighede,” sê Kobus Venter, die HUB.
Lees die volledige verklaring wat vrygestel is hier onder:
