DUITSLAND. – Die verhoor van ’n Duitse dokter (40), wat van 15 gevalle van moord beskuldig word, het gister in Berlyn begin.
Lees ook: Duitse owerhede ondersoek dokter vir moord
Aanklaers beweer die dokter, slegs bekend as Johannes M, het ’n kombinasie van spierverslappers en narkose gebruik om pasiënte in palliatiewe sorg tussen September 2021 en Julie 2024 dood te maak, sonder die pasiënte se medewete of goedkeuring. Volgens aanklaers het die spesifieke kombinasie respiratoriese spiere verlam wat gelei het tot versmoring, en binne minute die dood. Die meeste van die pasiënte, tussen 25 en 94 jaar oud, is in hulle huise dood. Alhoewel hulle ernstig siek was, sou hulle nie noodwendig binnekort gesterf het nie.
Die dokter het glo ook bewyse probeer vernietig deur vuur te maak in van die pasiënte se huise. Hy is op 6 Augustus 2024 in hegtenis geneem.
Nog 96 sake word ondersoek, insluitend die dood van die dokter se skoonma, wat kanker gehad het en oorlede is dieselfde naweek wat hy en sy vrou by haar gaan kuier het.
Bronne: Euronews, CBS News, The Straits Times
