GAUTENG. – Gauteng-polisie het Donderdag ‘n dwelmlaboratorium met ‘n geskatte waarde van meer as R10 m. op ‘n kleinhoewe aan die buitewyke van Westonaria ontdek. Twee verdagtes is in hegtenis geneem.
Lt.kol. Mavelo Masondo sê nasionale misdaadintelligensie het die plot vir verdagte aktiwiteite dopgehou. ‘n Deusoeking-en-beslagleggingslasbrief is verkry en deur die georganiseerde misdaadeenheid uitgevoer. Tydens deursoeking is op die dwelmlaboratorium afgekom. Mandrax en masjinerie vir die vervaardiging en verpakking van dwelms is gekonfiskeer.
Masondo sê die persoon wat volgens rapportering die eienaar van die huis is, is in die dwelmlaboratorium gevind en in hegtenis geneem. Nog ‘n verdagte is tydens die ondersoek gearresteer.
Die verdagtes is vir die vervaardiging van en handel in dwelms aangekla.
