Die Ebola-uitbreking in Sentraal-Afrika wek steeds wêreldwye kommer, maar gesondheidskenners sê die risiko dat die virus na Suid-Afrika versprei, bly tans laag. Volgens die jongste syfers is 1 963 bevestigde gevalle en 719 sterftes in die DRK aangemeld. In Uganda is 20 gevalle, waaronder twee sterftes, bevestig.
Die uitbreking, wat deur die Bundibugyo-variant van die Ebola-virus veroorsaak word, is hoofsaaklik in die Demokratiese Republiek die Kongo (DRK) gekonsentreer, met ‘n kleiner aantal gevalle in Uganda. Gesondheidsowerhede sê sedert 21 Junie is daar geen nuwe gevalle aangemeld nie.
Die Wêreldgesondheidsorganisasie (WGO) waarsku egter dat die werklike aantal besmettings moontlik veel hoër is, omdat baie gevalle nie opgespoor word nie. Die virus het reeds na nuwe gebiede in die DRK versprei.
In Suid-Afrika bly die risiko laag, omdat ebola nie deur die lug soos griep of Covid-19 versprei nie, volgens die nasionale instituut vir oordraagbare siektes. Die virus word hoofsaaklik oorgedra deur direkte kontak met die bloed of ander liggaamsvloeistowwe van ‘n besmette persoon. Suid-Afrika het reeds toesigstelsels en noodplanne in plek om enige moontlike inkomende geval vinnig op te spoor.
