UVONGO, KZN. – Nooddienste is Maandagoggend omstreeks 9:00 na ’n ongelukstoneel op die R61 naby Uvongo ontbied.
Met hulle aankoms op die toneel het hulle twee motors gevind wat reg van voor teen mekaar gebots het. Wrakstukke het oor die toneel versprei gelê.
’n Erg-beseerde persoon was nog in ’n wrakstuk vasgekeer. Mi7-reddingswerkers het saam met ander nooddienspersoneel en die plaaslike brandweer vir amper ’n uur gesukkel om die beseerde uit die wrak te bevry.
Hy het gevorderde lewensondersteuning ontvang en is op die toneel gestabiliseer voordat hy hospitaal toe vervoer is.
Vier ander beseerdes het ook op die toneel mediese behandeling ontvang en is na verskeie hospitale geneem.
Die oorsaak van die ongeluk is nog nie bekend nie.
Bronne: Mi7 National Group, Facebook
