WES-KAAP. – Die sanger, akteur en aanbieder Emo Adams en sy vrou, Michelle, was die slagoffers van diefstal uit hul motorvoertuie nadat dit oopgebreek en hul skootrekenaars gesteel is.
Adams het die voorval op sosiale media bekend gemaak en gesê hoewel die skootrekenaars vervang kan word, is dit die gevoel ná die tyd wat die meeste by hulle bly. Volgens hom laat so ‘n voorval ‘n mens kwesbaar en blootgestel voel. Hy sê dit laat jou wonder hoe iets soos dit kan gebeur terwyl jy hard werk, probeer om die regte dinge te doen en bloot met jou daaglikse lewe aan te gaan.
Adams het gesê die voorval herinner hom daaraan hoe nodig deernis en omgee in die wêreld is. Dit maak hom hartseer dat daar mense is wat bereid is om ander te benadeel vir eie gewin, nie net omdat dit met hom en sy vrou gebeur het nie, maar omdat soortgelyke misdaad daagliks talle mense raak. Ten spyte van die skok sê hy die ervaring het hulle ook laat besef dat besittings vervang kan word, maar mense nie. Hy en Michelle, wat met hul vier seuns in Kaapstad woon, is dankbaar dat hulle ongedeerd is en dat niemand tydens die voorval beseer is nie.
Die egpaar het ook hul waardering uitgespreek teenoor almal wat hulle ná die voorval ondersteun en hulp aangebied het. Volgens Adams het dié gebare hulle daaraan herinner dat daar, ondanks die slegte in die wêreld, steeds baie goeie mense is. Hy moedig mense aan om nie toe te laat dat ander se optrede hul menslikheid wegneem nie en om aan te hou om vriendelikheid en goedhartigheid te kies.
“Tonight we’re holding our family a little tighter.”
