Die Wes-Kaapse Regering se departement van kultuursake en sport nooi die publiek uit om plekke regoor die Wes-Kaap te nomineer vir erkenning as Provinsiale Erfenisterreine ingevolge die Nasionale Erfenishulpbronne-wet.
Provinsiale Erfenisterrein-status bied formele erkenning en wetlike beskerming aan plekke met kulturele betekenis en verseker dat dit verantwoordelik bestuur word vir huidige en toekomstige geslagte.
Tania Colyn, hoof van kommunikasie by die departement, sê ’n terrein kan vir dié status kwalifiseer indien dit historiese, estetiese, wetenskaplike, sosiale, geestelike, taalkundige of tegnologiese betekenis het, soos uiteengesit in Artikel 3 van die wet.
In die Wes-Kaap word nominasies beoordeel deur Erfenis Wes-Kaap, die provinsiale erfenishulpbronowerheid. Faktore soos ’n terrein se betekenis, ouderdom, egtheid, integriteit, skaarsheid, aanbiedingswaarde en kultuurhistoriese belang word oorweeg, met openbare waarde en gemeenskapsbetekenis as kernpunte.
Die beoordelingsproses vind oor etlike maande plaas en sluit ’n tegniese evaluering, openbare konsultasie en oorweging deur die Inventarisse-, Gradering- en Interpretasiekomitee in. Finale besluite word deur die raad van Erfenis Wes-Kaap geneem en in die provinsiale koerant gepubliseer.
Colyn beklemtoon dat openbare deelname ’n hoeksteen van erfenisbestuur is en moedig gemeenskappe aan om plekke van herinnering, geleefde ervaring en gedeelde identiteit te nomineer.
Nominasievorms is aanlyn beskikbaar by www.hwc.org.za en geld slegs vir terreine en kulturele erfenishulpbronne binne die Wes-Kaap.
