Die kroon van die Franse keiserin Eugénie, die vrou van Napoleon III, wat tydens ’n rooftog by die Louvre verlede Oktober beskadig is, is steeds “byna ongeskonde” en kan volledig herstel word, het die museum bevestig.
Die kroon is laat val toe diewe op die vlug was nadat juwele ter waarde van sowat €88 miljoen by die Louvre gesteel is. Volgens die Louvre is die kroon erg vervorm toe die rowers dit deur ’n smal opening in die glasvertoonkas probeer verwyder het. Een van die agt goue arende ontbreek, maar al 56 smaragde en die meeste van die 1 354 diamante is steeds intak.
Volgens France 24 sal die 19de-eeuse kroon sonder rekonstruksie tot sy oorspronklike toestand herstel word onder toesig van ’n kundige komitee, gelei deur die Louvre se president, Laurence des Cars.
Vier verdagtes is reeds in hegtenis geneem, maar die meesterbrein agter die rooftog en die res van die gesteelde juwele is steeds soek.
Bronne: France 24, BBC
