GAUTENG. – Die Gautengse departement van onderwys het 805 688 aansoeke vir gr. 1 en gr. 8 vir die 2027-skooljaar ontvang, wat die groot aanvraag vir plekke by openbare skole beklemtoon.
Die aansoektydperk het Vrydag 4 September om middernag gesluit. Altesaam 357 468 ouers en voogde het aanlyn geregistreer. Omdat ouers meer as een skool kan kies, verteenwoordig die aantal aansoeke nie die aantal individuele leerders nie. Die departement het 169 396 unieke gr. 1-leerders en 177 481 unieke gr. 8-leerders aangeteken. Dit beteken dat 346 877 individuele leerders vir plekke in dié twee grade aansoek gedoen het.
Hoërskool Langehoven in Tshwane-Wes het met 3 462 vir gr. 8 die meeste aansoeke ontvang. Dit is gevolg deur Hoërskool Alberton met 2 756, Hoërskool Katlehong met 2 747, Spesialis Ingenieurskool Katlehong met 2 573 en Hoërskool Parktown Boys’ met 2 448.
Vir Gr. 1 het Laerskool Akasia in die noorde van Pretoria met 1 355 die meeste aansoeke ontvang. Laerskool Palmridge het 1 330 aansoeke ontvang, gevolg deur Laerskool Alston met 1 207, Laerskool Lakeside met 1 162 en Laerskool Stoneridge met 1 153.
Plasing sal volgens voorgeskrewe kriteria geskied, onder meer die leerder se huisadres, die skool se voedingsgebied, afstand, ’n broer of suster wat reeds by die skool is en, waar van toepassing, die ouer se werkadres. Waar geen plek by enige van die skole wat ’n ouer gekies het beskikbaar is nie, kan die departement ’n plek by die naaste skool met beskikbare kapasiteit aanbied.
Ouers met uitstaande dokumente het tot 11 September 2026 om 12:00 om gesertifiseerde dokumente in te dien of op te laai. Plasings vir ouers met volledige aansoeke sal na verwagting vanaf 15 Oktober 2026 begin.
Druk hier om meer te lees.
